Едукацијата се одвива во едукативно-искуствена група. Сеансите се во траење од 180 минути (3 часови) еднаш во неделата, или по пат на работилници од 3 (три) викенд сеанси секоја во траење од 180 минути. Со тоа се обезбедуваат 12 ( дванесет) школски часови едукација во текот на еден месец.

Една сеанса се состои од четири дела:

1. Загревање: подготовка на членовите на групата за поголема спонтаност и креативност, фокусирање и увид во сопствените доживувања, вклучување во групната динамика, интензивирање на интеракцијата меѓу членовите, вклучување во настаните во групата, главна цел на загревањето е членовите на групата да се загреат како можни протагонисти;
2. На протагонист центрирана сеанса: по изборот, протагонистот на сцена го поставува проблемот или прашањата кои сака да ги истражи што се прави со активно учество на водителот (кој во психодрамата се вика директор) и останатите членови, во вид на т.н. помошни ега, со употреба на основните психодрамски техники: промена на улога, огледало, двојник итн., се развива акцијата низ една (вињета) или повеќе сцени;
3. Споделување: со завршетокот на сеансата центрираната на протагонистот, протагонистот заедно со останатите членови од групата седнуваат во круг по што останатите членови ги споделуваат со протагонистот сопствените искуства и доживувања за време на акцијата, обраќајќи му се нему и споделувајќи со него дел од нивната интима, како што протагонистот со нив споделувал за време на сеансата центрираната на протагонистот.
4. Процес, или дијалог: се анализираат случувањата од сеанса;

Процес на едукација: Членовите на едукативната група постапно напредуваат во процесот на едукација, го усовршуваат користењето на психодрамски техники, го прошируваат своето искуство како водители на група и обавуваат работа на себе како дел од супервизискиот процес за кој се цени дека е неопходен за професијата психотерапевт.

Динамика на стекнување на знаења и искуство од областа на психодрамата:

• Првата година се состои од искуствено учество во група, работа како протагонист и помошно его, каде членовите на групата се запознаваат со психодрамскиот метод и техники, учествуваат во процесот и учествуваат во теоретскиот дел на едукацијата. Во текот на првата година потребни се најмалку 6 (шест) работења како протагонист во долги на протагонист центрирани сеанси. Во текот на првата година, едукантите се поттикнуваат да водат загревање и процес, и вињети (едночинки) или кратки на протагонист центрирани сеанси во една или две сцени.
• Во текот на втората година, членовите на групата ги развиваат своите вештини во работа како водител/директор на психодрамска сеанса. Покрај процес, акциско загревање и вињети, едукантите целосно ја преземаат улогата на директор. Водат загревање, организираат избор на протагонист, со избраниот протагонист поставуваат и развиваат психодрамски сцени и на крај го водат споделувањето. Во втората година потребни се најмалку 6 пати работа на себе како протагонист и 6 пати како директор на сеанса од 3 часови, со водење на сите делови од сеансата (Загревање, На протагонист центрирана сеанса и Споделување).

Како дополнување на практичната едукација, едукантите добиваат и вкупно 40 часови теоретска едукација. Теоретската едукација содржи двочасовни месечни сеанси (вкупно 20 часа годишно). Сеансите се организирани во вид на презентација и групна дискусија каде се обработуваат теми од теоријата на психодрамата, групната психотерапија, психотерапијата, психологијата и психопатологијата. Во рамки на теоретскиот дел, секој член од групата треба да подготви најмалку 2 презентации за групата. Како дел од теоретската едукација, членовите на групата треба да подготват два есеи на крајот од секоја година, првиот претставува анализа на сопствените доживувања како протагонист и член на група, а вториот анализа на сеанси кои ги воделе како директор на психодрамска сеанса.

За да се вклучат во дополнителна едукација од психодрама, кандидатите треба да:

1. Се на возраст од најмалку 23 години. Лица помлади од 23 години можат да започнат со работа во искуствениот дел од едукативната група;
2. Имаат завршено високо образование или последна година на студии на Факултетите по медицина, психологија, Факултет за социјални работи, дефектологија, педагогија, социологија и сродни дисциплини и науки;

Заинтересирани кандидати треба да испратат:

• Професионална биографија и опис на актуелното искуство и едукација од психотерапија и евентуално клиничко искуство;
• Лична биографија напишана на психотераписки начин;

Пред почетокот на едукацијата се врши интервју.

Со завршување на втората година се добива сертификат за поминати 320 часови по психодрамска едукација.