Историјата на психодрамата е тесно поврзана со животната историја, филозофски погледи и творечката дејност на Јаков Леви Морено (1889-1974). Роден е во Букурешт, од својата 6-та година со семејството се преселил во Виена, каде дипломирал медицина. Од својата 14 година, кога се развеле неговите родители тој живеел сам.

Во тек на живеењето и работата во Виена се сретна со Фројд и во разговор со него му посочил:
“Господине Фројд, јас почнувам таму каде вие завршувате. Вие ги анализирате луѓето во вештачкиот амбиент на Вашата ординација. Јас ги сретнувам во нивните природни средини – на улица, во парковите, во нивните домови. Вие ги анализирате нивните соништа. Јас ги учам повторно да сонуваат.“

За време на првата светска војна Морено работел во камп со бегалци на границата на Австрија со Италија.

Тука тој ги поставил основите на социометријата.

Во дваесетите години од дваесетиот век Морено го основал Театарот на спонтаноста за возрасни, каде секој има право да учестува, сите се играчи, каде наместо да се раскажува текстот тој се одигрува на сцена. Тука прв пат е употребен изразот encounter (Средба на двајца: очи во очи, лице во лице. И кога ќе ми бидеш блиску, јас ќе ги земам твоите очи и ќе ги ставам во моите, а ти ќе ги земеш моите очи и ќе ги ставиш во своите и јас ќе гледам со твоите, а ти ќе гледаш со моите очи).

Од овој театар се развиле два правци: едниот е Театар на спонтана средба, а другиот е Психотерапија со психодрама.

По завршувањето на специјализацијата Морено се преселил во САД. Тука се борел за местото на психодрмата како специфичен и оригинален тераписки пристап. Морено бил и еден од основачите на Американската асоцијација за групна психотерапија.

Од средината на дваесетиот век до крајот на неговиот живот во 1974год., живеел и работел со својата животна сопатничка и креативен соработник Зерка Морено Тоеман.

На неговиот надгробен спомен стои испишано: „Овде лежи човекот кој ја донесе смеата во психијатријата“.
Морено е автор на повеќе пишани дела : Човек и дете, Повик на средба, Тишина, Бог како креатор, Бог како глумец…

Меѓу другото Морено бил и пронаоѓач и посакувајќи звучно да го запише она што се случувало на сцената тој го измислил претходникот на денешниот касетофон (tape recorder).